ကြယ်ကြွေသတို့သား
သူငယ်ချင်း
မင်းဟာ ယုံကြည်ရာကို
ရင်သွေးလိုလည်း မွေးခဲ့တယ်။
သူငယ်ချင်း
မင်းဟာ ဒဏ်ရာတွေကို
ဆီမီးလိုလည်း ထွန်းခဲ့တယ်။
သူငယ်ချင်းမင်းဟာ
ကိုယ့်အနာကိုယ့်လျှာနဲ့ ပြန်သပ်
ရှင်တတ်ခဲ့ပြီးပြီပဲ။
သူငယ်ချင်းမင်းဟာ
ကိုယ့်အရေပြား
ကိုယ်လွှာကိုယ့်အရိုးကို
အပ်လိုသွေးကိုယ့်ဝတ်စုံ
ကိုယ်ချုပ်လို့ကျကျနန လှခဲ့ပြီးပြီပဲ။
သူငယ်ချင်းသွားနှင့် သူငယ်ချင်း
ကြယ်အစင်းစင်း
ကြွေတဲ့ဟောဒီကမ္ဘာမြေရဲ့
အနာတရတွေကိုစွမ်းသမျှ
ကုစားဖို့ငါတို့ နေရစ်ခဲ့ဦးမယ်။
သွားနှင့် သူငယ်ချင်း
နေအစင်းစင်းပူတဲ့
ကမ္ဘာမြေရဲ့ ဒဏ်ရာတွေကို
လက်ဖ၀ါးတွေနဲ့ ကာကွယ်ဖို့
ငါတို့ နေရစ်ခဲ့ဦးမယ်။
သွားနှင့် သူငယ်ချင်း
ကမ္ဘာမြေရဲ့ ကြေကွဲခြင်း
ဓာတ်ပြားထဲမင်းရဲ့ ကဗျာတွေ
မာတိကာစီဖို့ငါတို့ နေရစ်ခဲ့ဦးမယ်။
သွားနှင့် သူငယ်ချင်း
ကျောင်းနံရံတ၀ိုက်
ဒေါင်းအလံ ပြန်စိုက်တဲ့တစ်နေ့ငါတို့ .......... ။
မင်းကိုနိုင်
ဆရာတာရာမင်းဝေရဲ့ ဈာပနမှာကိုမင်းကိုနိုင်ရွတ်ခဲ့တဲ့ကဗျာလေးဖြစ်ပါတယ်။
ကြိုက်လွန်းလို့ သူငယ်ချင်း ဆီကနေ ကော်ပီကူးလာတာပါ။ တင်မယ်နော်...
No comments:
Post a Comment